Béa Pfeuti
Ja ja, au ich bi uf d'Wält cho, z'Züri.
Hobbies:
Läse und kreativ sii uf verschiedeni Arte.
Zämesii mit Fründe und Kollege.
Uusbildig:
Immer nanig fertig, jetzt staht grad Italienisch intensiv im Kaländer.
Sit über 8 Jahr bin ich Mami und, au wänn's de Bruef bi eus uf dr Gmeind nanig wänd känne, Family-Manager. Au wänns mich langsam wider reize würd go z'schaffe, bin ich froh, dass ich im Momänt nöd muess i dere verruckte Gschäftswält usse sii. Zuelose langed vorig.
Am meischte beschäftiged mich scho mini beide Meitli. Während de Schuelziit wird mis Aaforderigsprofil na mit Portier und Chauffeuse ergänzt. Zudem händs meischtens dänn die genialschte Idee was ihri Freiziitgschtaltig betrifft, wänn d'Muetter sowieso am wenigschte Ziit für Extrawürscht hät. Wenigschtens bewährt sich mis Motto.
Sit ich über d'Uusaag "Lesen gefährdet die Dummheit" gstolperet bi und mich ändlich überwunde und mir de längscht fällig neui Läbesabschnittspartner zueta ha, gsehn ich d'Buechstabe wider dütlicher und s'Läse macht wider Freud. Erschte Schüüb vo Arterieverchalchig sötti eso de Rigel gschobe werde chönne.
De Marco chönti uf mini "super" Kommentär verzichte, wänn er bim Play Station-Race wider emal fuschted will er im Juhee usse glanded isch. Und er vertreit au nöd bsunders guet, wänn ich hektisch wird, will mir wieder emal knapp sind zum rächtziitig uf Bsuech z'gah.
D'Jasmin chan mim Putzfimmel wenig positivs abgwünne, will sie sich i ihrem Chaos wohl fühlt und findet, eimal im Monet ufrume langi vorig. Und au das isch na z'vill.
D'Sara teschted scho emal wie's sii wird als Teenager. Das isch ja bekanntlich die Phase, wänn d'Eltere schwirig wärded... Und d'Sara isch gar nöd glücklich ab mim Tue...
Chönne Gschichte schriibe, für Grossi und Chliini. Und im nöchschte Läbe chönne singe wie d'Céline Dion, oder na besser.